Skip to main content

Recommended links

Warning notification:Warning

Unfortunately, you are using an outdated browser. Please, upgrade your browser to improve your experience with HSE. The list of supported browsers:

  1. Chrome
  2. Edge
  3. FireFox
  4. Opera
  5. Safari

Iadsan ar cheart dóibh vacsaín in aghaidh COVID-19 a fháil

Molaimid vacsaín in aghaidh COVID-19 do dhaoine a bhfuil riosca ann go n-éireoidís go dona tinn de bharr COVID-19.

Tá comhairle ar leith againn:

Cé na daoine ar cheart dóibh 1 dáileog a fháil gach bliain

Molaimid vacsaín saor in aisce in aghaidh COVID-19 uair sa bhliain:

  • má tá tú idir 60 agus 79 bliain d'aois
  • má tá riocht ort a bhfuil riosca ag baint leis go n-éireofá go dona tinn de bharr COVID-19 agus má tá tú idir 6 mhí agus 79 bliain d’aois

Fan 3 mhí ar a laghad tar éis ionfhabhtú COVID-19 a bheith ort sula bhfaighidh tú an vacsaín.

Mura bhfuil riosca ann go n-éireofá go dona tinn

Ní mholaimid gnáthvacsaíniú do dhaoine fásta idir 18 agus 59 bliain d’aois nach bhfuil riosca ann dóibh go n-éireoidís go dona tinn de bharr COVID-19.

Ach is féidir leat labhairt le dochtúir teaghlaigh nó le cógaiseoir faoi 1 dáileog den vacsaín in aghaidh COVID-19 a fháil gach bliain más mian leat vacsaín in aghaidh COVID-19 a fháil.

Cé na daoine ar cheart dóibh 2 dháileog a fháil gach bliain

Molaimid 2 dháileog den vacsaín in aghaidh COVID-19 gach bliain:

  • má tá tú 80 bliain d’aois nó os a chionn
  • má tá cónaí ort i saoráid cúraim fhadtéarmaigh agus 18 mbliana d’aois slánaithe agat
  • má tá córas lag imdhíonachta ort agus má tá tú 6 mhí d’aois nó níos sine

Fan 3 mhí ar a laghad sula bhfaighidh tú an vacsaín tar éis:

  • an vacsaín dheireanach in aghaidh COVID-19 a fuair tú
  • ionfhabhtú COVID-19

Córas lag imdhíonachta agus vacsaíní in aghaidh COVID-19

Vacsaíniú in aghaidh COVID-19 do leanaí

Cén chaoi do thaifead vacsaínithe a aimsiú i do chuntas FSS

Má tá MyGovID fíoraithe agat, is féidir leat roinnt taifead vacsaínithe de chuid FSS a sheiceáil ar líne.

  1. Téigh chuig cuntas FSS.
  2. Lean na treoracha chun logáil isteach le do MyGovID fíoraithe.
  3. Scrollaigh síos agus roghnaigh Taifid othar - tagann na vacsaíní i ndiaidh cógais aisíoctha.

Mura bhfuil MyGovID fíoraithe agat, is féidir leat cuntas a chruthú.

Tógann sé cúpla lá ar do thaifid sláinte teacht aníos tar éis duit logáil isteach i do chuntas FSS den chéad uair.

Cén chaoi MyGovID fíoraithe a fháil – mygovid.ie

Cén chaoi do thaifead vacsaínithe a aimsiú in Aip Shláinte FSS

Má tá MyGovID fíoraithe agat agus Aip Shláinte FSS, is féidir leat roinnt taifead vacsaínithe de chuid FSS a sheiceáil.

  1. Oscail Aip Shláinte FSS.
  2. Lean na treoracha chun logáil isteach le do MyGovID fíoraithe.
  3. Ón roghchlár ag an mbun, roghnaigh Mo shláinte.
  4. Scrollaigh síos agus roghnaigh Taifid othar - tagann na vacsaíní i ndiaidh cógais aisíoctha.

Mura bhfuil MyGovID fíoraithe agat, is féidir leat cuntas a chruthú.

Tógann sé cúpla lá ar do thaifid sláinte teacht aníos tar éis duit logáil isteach san aip den chéad uair.

Cén chaoi MyGovID fíoraithe a fháil – mygovid.ie

Cén chaoi logáil isteach in Aip Shláinte FSS

Mura bhfuair tú vacsaín in aghaidh COVID-19 riamh

Is féidir leat vacsaín in aghaidh COVID-19 a fháil am ar bith mura bhfuair tú vacsaín in aghaidh COVID-19 riamh roimhe seo.

Labhair le dochtúir teaghlaigh faoi:

  • an riosca go n-éireofá go dona tinn de bharr COVID-19
  • cé mhéad dáileog a theastaíonn uait
  • an t-am is fearr chun an vacsaín a fháil

Na háiteanna le vacsaín in aghaidh COVID-19 a fháil

Is féidir le daoine atá 12 bhliain d’aois nó os a chionn:

  • dul chuig dochtúir teaghlaigh a thairgeann an vacsaíniú in aghaidh COVID-19
  • dul chuig cógaslann rannpháirteach
Aimsigh dochtúir teaghlaigh
Aimsigh cógaslann a thugann an vacsaín in aghaidh COVID-19

Is féidir leat glao a chur ar HSE Live freisin lena fháil amach cá háit ar féidir vacsaín a fháil i do cheantar féin.

Saorghlao 1800 700 700

I gcás daoine atá faoi bhun 16 bliana d'aois, ní mór dóibh dul faoi vacsaíniú in éineacht le tuismitheoir nó caomhnóir dlíthiúil.

Má tá do leanbh faoi bhun 12 bhliain d’aois

Ní mór coinne a bheith ag leanaí faoi bhun 12 bhliain d’aois chun an vacsaín in aghaidh COVID-19 a fháil.

Chun coinne a dhéanamh do do leanbh, cuir glao ar HSE Live ar an uimhir shaorghlao 1800 700 700.

Ní féidir le leanaí faoi bhun 12 bhliain d’aois an vacsaín a fháil i gcógaslann ná in ionad dochtúra teaghlaigh. Is difriúil an dáileog vacsaíne do leanaí óga.

Vacsaíniú i gcúram cónaithe nó sa bhaile

Tugann foirne vacsaínithe FSS an vacsaín:

  • in áiseanna cúraim cónaithe, lena n-áirítear tithe altranais
  • do dhaoine nach bhfuil in ann a dteach a fhágáil

Chun vacsaíniú sa bhaile a shocrú, déan teagmháil le do dhochtúir teaghlaigh nó cuir glao ar HSE Live ar an uimhir shaorghlao 1800 700 700.

Na vacsaíní a úsáidimid

Is vacsaín mRNA í an vacsaín Comirnaty (a dhéanann Pfizer). Seo í an vacsaín in aghaidh COVID-19 a úsáidimid d’fhormhór na ndaoine.

Fo-iarmhairtí agus sábháilteacht na vacsaíní in aghaidh COVID-19

Ní féidir le roinnt daoine vacsaín mRNA a fháil, nó roghnaíonn siad gan ceann a fháil. Sa chás sin, moltar an vacsaín Nuvaxovid (Novavax) de ghnáth.

An vacsaín Nuvaxovid (Novavax)

Níl fáil ar an vacsaín Nuvaxovid (Novavax) in Éirinn faoi láthair.

Táimid ag iarraidh soláthairtí den vacsaín a fháil ach níl a fhios againn an mbeidh sí ar fáil ná cathain a bheidh.

Is féidir leat glao a chur ar HSE Live agus iarraidh go ndéanfaí teagmháil leat má bhíonn Nuvaxovid (Novavax) ar fáil.

Saorghlao 1800 700 700

Cé chomh fada agus a thógann sé ar an vacsaín in aghaidh COVID-19 tosú ag obair

D’fhéadfadh sé suas le 14 lá a thógáil ar do chóras imdhíonachta freagairt don vacsaín agus cosaint a thabhairt duit ar aimhréidheanna tromchúiseacha COVID-19.

Tá fianaise láidir, iontaofa ann go bhfuil na vacsaíní in aghaidh COVID-19 an-éifeachtach chun breoiteacht thromchúiseach agus bás de bharr COVID-19 a chosc.

Athbhreithniú deireanach ar an leathanach: 21/09/2026
Le hathbhreithniú arís: 21/09/2029