Is í an vacsaín fliú an chosaint is fearr atá ar fáil in aghaidh fliú.
Má tá tú 60 bliain d’aois nó os a chionn, is féidir leat an vacsaín fliú a fháil saor in aisce gach bliain.
Cá háit ar féidir an vacsaín fliú a fháil saor in aisce
Is féidir leat an vacsaín fliú a fháil ó dhochtúir teaghlaigh nó ó chógaiseoir.
Is féidir leat an vacsaín fliú a fháil san áit a bhfuil cónaí ort:
- má tá cónaí ort i dteach altranais
- má tá tú gafa sa teach
Cén fáth ar cheart do dhaoine scothaosta an vacsaín fliú a fháil
Is féidir leis an bhfliú a bheith contúirteach do dhaoine de gach aois.
Ach i gcás daoine atá 60 bliain d’aois nó os a chionn a tholgann an fliú, is mó an baol:
- go mbeadh breoiteacht thromchúiseach orthu
- go mbeadh orthu dul chuig an ospidéal
- go bhfaighidís bás de bharr an fhliú
Formhór na ndaoine a fhaigheann bás de bharr an fhliú, bíonn siad 60 bliain d’aois nó os a chionn.
Cineálacha vacsaíne fliú
Cuirimid cineálacha éagsúla den vacsaín fliú ar fáil ag brath ar d’aois:
- vacsaín fliú chaighdeánach - daoine fásta suas go 64 bliain d’aois
- vacsaín fliú fheabhsaithe - daoine fásta atá 65 bliain d’aois nó os a chionn
Vacsaín fliú fheabhsaithe
De réir mar a théann tú in aois, seans nach bhfreagródh do chóras imdhíonachta chomh maith sin don vacsaín fliú chaighdeánach.
Tá comhábhar ar a dtugtar aidiúvach sa vacsaín fliú fheabhsaithe. Méadaíonn aidiúvaigh an fhreagairt imdhíonachta i gcomparáid le vacsaíní caighdeánacha.
Imdhíonacht
Ní mór duit an vacsaín fliú a fháil gach bliain mar:
- athraíonn na tréithchineálacha fliú ó bhliain go bliain
- éiríonn na hantasubstaintí a chosnaíonn thú níos laige le himeacht ama
Cé na daoine nár cheart dóibh an vacsaín fliú a fháil
Níor cheart duit an vacsaín fliú a fháil:
- má bhí frithghníomhú trom ailléirgeach agat tar éis vacsaín fliú eile nó i leith aon cheann de chomhábhair na vacsaíne
- má tá teocht 38 céim Celsius nó níos airde ná sin ort – fan go dtí go mbeidh tú tagtha ar ais chugat féin arís sula bhfaighidh tú an vacsaín
Labhair le do dhochtúir teaghlaigh nó le do dhochtúir ar dtús
Labhair le do dhochtúir teaghlaigh nó le do dhochtúir speisialtóra:
- má tá cineál tromchúiseach neodraipéine ort (líon íseal cineáil fuilcheall bán)
- má tá tú ag glacadh cógas ar a dtugtar comhchoscairí seicphointí – ipilimumab agus niovolúmab, cuir i gcás
B’fhéidir go mbeidh ort fanacht sula bhfaighidh tú an vacsaín fliú.
An vacsaín fliú agus ailléirge uibhe
Má tá ailléirge uibhe agat, labhair le do vacsaíneoir sula bhfaighidh tú an vacsaín. Is féidir le mórchuid na ndaoine a bhfuil ailléirge uibhe orthu an vacsaín fliú a fháil.
Fo-iarmhairtí
Tar éis duit an vacsaín a fháil, b’fhéidir go mbeadh roinnt fo-iarmhairtí éadroma ort.
I measc na bhfo-iarmhairtí éadroma a d’fhéadfadh a bheith ann tá:
- pian, deirge nó at san áit ar tugadh an t-instealladh duit
- tinneas cinn
- fiabhras (teocht ard - 38 céim Celsius nó os a chionn)
- tinneas agus pianta
- tuirse
Seans go mbeidh níos mó de na fo-iarmhairtí éadroma ag daoine a fhaigheann an vacsaín fliú fheabhsaithe. Mar shampla, deirge san áit ar tugadh an t-instealladh, lámh thinn nó pianta matán.
Má thagann aon cheann de na fo-iarmhairtí sin ort, lig do scíth agus glac paraicéiteamól.
Fo-iarmhairtí tromchúiseacha
Ní fheictear fo-iarmhairtí tromchúiseacha, amhail frithghníomhú trom ailléirgeach, ach go hannamh.
Aimsigh an bhileog eolais d'othair
Is féidir leat teacht ar na bileoga eolais d’othair do na vacsaíní ar líne.
Fluad is ainm don vacsaín fliú fheabhsaithe. Vaxigrip nó Influvac Sub-unit is ainm do na vacsaíní fliú caighdeánacha.
Cén chaoi teacht ar do bhileog eolais d’othair ar líne
Fo-iarmhairtí a thuairisciú
Má cheapann tú go bhfuil fo-iarmhairt ort tar éis duit vacsaín a fháil, is féidir leat í a thuairisciú don Údarás Rialála Táirgí Sláinte (HPRA).
Is féidir le do dhochtúir, le d’altra, le do chógaiseoir nó le duine de do theaghlach an fho-iarmhairt a thuairisciú don HPRA freisin.
Tuairiscigh iarmhairtí díobhálacha don Údarás Rialála Táirgí Sláinte – hpra.ie
Vacsaíní eile
Is féidir leat an vacsaín fliú a fháil ag an am céanna leis na vacsaíní seo a leanas:
- vacsaín niúmacocúil
- Vacsaín in aghaidh COVID-19
Má tá tú 65 bliain d’aois nó os a chionn, is féidir leat vacsaín niúmacocúil a fháil saor in aisce. Ní gá duit an vacsaín seo a fháil ach uair amháin.
Cosnaíonn an vacsaín niúmacocúil thú ar an niúmóine.