Tá an vacsaín fliú idir éifeachtach agus slán sábháilte. Déanann sí a cion féin le tú a chosaint ar an bhfliú. Is é an t-am is fearr leis an vacsaín fliú a fháil ná sula dtosaíonn séasúr an fhliú.
Bíonn sí ar fáil ó mhí Dheireadh Fómhair go deireadh mhí Aibreáin gach bliain.
Cá háit ar féidir an vacsaín fliú a fháil?
Is féidir leat an vacsaín fliú a fháil saor in aisce ó do dhochtúir teaghlaigh nó ó chógaslann anois.
Is féidir leat an vacsaín fliú a fháil san áit a bhfuil cónaí ort:
- má tá cónaí ort i dteach altranais
- má tá tú gafa sa teach
An chaoi a dtugtar í
I gcás daoine fásta, tugtar an vacsaín fliú mar instealladh isteach i do ghéag láimhe.
I gcás leanaí, tugtar an vacsaín fliú mar sprae isteach ina srón (sprae sróine).
Cé atá in ann vacsaín fliú saor in aisce a fháil?
Is féidir vacsaín fliú a fháil saor in aisce:
- má tá tú 60 bliain d’aois nó os a chionn
- má tá tú idir 2 bhliain agus 17 mbliana d’aois
- más oibrí cúraim sláinte thú
- má tá tú ag iompar clainne
- má tá cónaí ort i dteach altranais nó i saoráid eile cúraim fhadtéarmaigh
- má bhíonn tú i dteagmháil rialta le muca, éanlaith chlóis nó éanlaith uisce
- má tá riocht sláinte ort a fhágann go mbeadh riosca ní b’airde ann dá dtolgfá fliú (6 mhí d’aois agus os a chionn)
- má tá cónaí ort le duine a bhfuil riocht sláinte air a fhágann go mbeadh riosca ní b’airde ag baint leis an bhfliú
- más cúramóir thú do dhuine a bhfuil riocht sláinte air a fhágann go mbeadh riosca ní b’airde ag baint leis an bhfliú
Céard is cúramóir ann?
Is éard is cúramóir ann ná duine a thugann leibhéal suntasach cúraim leanúnaigh do dhuine a bhfuil cúram sa bhaile de dhíth air de dheasca breoiteachta, míchumais nó anbhainne.
Ní thairgfear vacsaíní fliú saor in aisce do dhaoine a bhfuil cónaí orthu le:
- daoine atá 60 bliain d’aois nó os a chionn nach bhfuil riocht sláinte ainsealach orthu freisin
- mná atá ag iompar clainne
- leanaí idir 2 bhliain agus 17 mbliana d’aois
- oibrithe cúraim sláinte
- cúramóirí
Mura bhfuil tú i dteideal vacsaín fliú saor in aisce
Mura bhfuil tú i dteideal vacsaín fliú saor in aisce, beidh tú fós in ann vacsaín a fháil i gcógaslann nó ó chlinic dochtúra teaghlaigh. Ach beidh ort íoc aisti.
Cá fhad a thógann sé ar an vacsaín fliú tosú ag obair?
Tógann sé 2 sheachtain ar an vacsaín tosú ag obair. Ba cheart go gcosnódh sí i rith an tséasúir fliú thú.
Fo-iarmhairtí
Tar éis duit an vacsaín a fháil, b’fhéidir go mbeadh roinnt fo-iarmhairtí éadroma ort.
Ina measc tá:
- pian, deirge nó at san áit ar tugadh an t-instealladh duit
- fiabhras (teocht ard - 38 céim Celsius nó os a chionn)
- cur allais agus crith
- tinneas cinn
- tinneas agus pianta
- tuirse
Má thagann aon cheann de na fo-iarmhairtí sin ort, lig do scíth agus glac paraicéiteamól.
Fo-iarmhairtí tromchúiseacha
Ní fheictear fo-iarmhairtí tromchúiseacha, amhail frithghníomhú trom ailléirgeach, ach go hannamh.
I gcásanna an-annamh, tuairiscíodh Siondróm Guillain-Barré (GBS). Is riocht é Siondróm Guillain-Barré (SGB, nó GBS i mBéarla) a chuireann isteach ar néaróga an choirp. Bíonn sé ina chúis le hathlasadh néaróg agus d’fhéadfadh pian, fuairnimh, laige matáin agus deacracht siúl a bheith ann mar thoradh air. Is mó ar fad an seans go bhfaighidh tú Siondróm Guillain-Barré ón bhfliú ná ón vacsaín fliú.
Report side effects
You can report any suspected side effects to the Health Products Regulatory Authority (HPRA): report an issue - hpra.ie
An vacsaín fliú agus teanndáileog COVID-19
Vacsaíní ar leith iad an vacsaín fliú agus an teanndáileog den vacsaín in aghaidh COVID-19.
Is féidir leat an dá cheann acu a fháil ag an am céanna más rud é go bhfuil sé in am duit teanndáileog den vacsaín in aghaidh COVID-19 a fháil chomh maith.
Reáchtáiltear gach uile chlár imdhíonta de chuid FSS i gcomhréir le moltaí an Choiste Comhairligh Náisiúnta um Imdhíonadh (NIAC).