An scoil, an suíomh cúraim leanaí agus COVID-19

Úsáid an leathanach seo leis na nithe seo a fháil amach:

cathain ba cheart mo leanbh a choinneáil sa bhaile ón scoil nó ón suíomh cúraim leanaí?
ar cheart dom mo leanbh a chur chuig an scoil nó chuig suíomh cúraim leanaí?
cathain is féidir le mo leanbh filleadh ar an scoil tar éis dó tástáil a fháil le haghaidh COVID-19?

Má tá siomptóim ar do leanbh

Ba cheart do do leanbh fanacht sa bhaile agus fanacht glan ar dhaoine eile a oiread agus is féidir:

má tá siomptóim COVID-19 air nó uirthi agus:

má tá sé nó sí tinn
má tá teocht ard (38 céim Celsius nó os a chionn) air nó uirthi

Ní gá dó nó di tástáil le haghaidh COVID-19 a dhéanamh ach amháin má thugann dochtúir teaghlaigh nó gairmí sláinte comhairle dó nó di déanamh amhlaidh.

Urgent advice: Déan teagmháil le dochtúir teaghlaigh:

go bhfuil siomptóim COVID-19 ar do leanbh agus:

má tá sé nó sí 3 mhí d’aois nó faoina bhun
má tá sé nó sí ag aireachtáil go dona tinn agus imní ort faoi na siomptóim atá air nó uirthi
má tá riocht sláinte air nó uirthi a fhágann go bhfuil sé nó sí i mbaol níos mó ó COVID-19

Cathain ba cheart do leanbh a choinneáil sa bhaile ón scoil nó ón suíomh cúraim leanaí

Coinnigh do leanbh sa bhaile:

má tá siomptóim COVID-19 air nó uirthi agus é nó í ag aireachtáil tinn – tá sé ceart go leor do leanbh a chur chuig an scoil más rud é gurb iad srón ag sileadh nó sraothartach an t-aon siomptóm atá air nó uirthi
má tá teocht ard (38 céim Celsius nó os a chionn) air nó uirthi
má tá toradh deimhneach faighte aige nó aici ar thástáil le haghaidh COVID-19
má tá buinneach air nó uirthi agus má tá sé nó sí 12 bhliain d'aois nó níos óige

Ar cheart dom mo leanbh a chur chuig an scoil nó chuig suíomh cúraim leanaí?

De ghnáth, beidh sé ceart go leor do leanbh a chur chuig an scoil nó chuig suíomh cúraim leanaí nuair:

nach bhfuil ach siomptóim shrónacha air nó uirthi, mar shampla srón ag sileadh nó sraothartach, ach tá sé nó sí ag aireachtáil go maith seachas sin
nach bhfuil aon siomptóim nua tagtha air nó uirthi le 48 uair an chloig
nach raibh buinneach air nó uirthi le 48 uair an chloig

Má fhaigheann do leanbh toradh deimhneach ar thástáil

Má fhaigheann do leanbh toradh deimhneach ar thástáil, ba cheart dó nó di:

fanacht sa bhaile go ceann 3 lá iomlána ón lá ar tháinig na siomptóim air nó uirthi den chéad uair
fanacht glan ar dhaoine eile a oiread agus is féidir

Má tá COVID-19 ar do leanbh

Daoine atá ina gcónaí le do leanbh

Ba cheart do dhaoine atá ina gcónaí le do leanbh agus a bhfuil riosca ard ag baint le COVID-19 dóibh ó thaobh breoiteacht thromchúiseach de a bheith an-chúramach. Tá riosca níos airde ann go bhfeadfadh an víreas teacht orthu. Má thagann siomptóim orthu, ba cheart dóibh glao a chur ar a ndochtúir teaghlaigh.

Filleadh ar an scoil nó ar an suíomh cúraim leanaí tar éis toradh deimhneach a fháil ar thástáil

Is féidir le do leanbh filleadh ar an scoil nó ar an suíomh cúraim leanaí nuair is fíor an dá rud seo:

ní raibh teocht ard (38 céim Celsius nó os a chionn) air nó uirthi ná siomptóim eile le 48 uair an chloig
tá 3 lá caite ó tháinig siomptóim air nó uirthi den chéad uair

Má tá do leanbh chun filleadh ar an scoil nó ar an suíomh cúraim leanaí:

ní gá tástáil eile a dhéanamh air nó uirthi
ní gá dó nó di toradh diúltach ar thástáil a thaispeáint
níl deimhniú ná nóta ó dhochtúir teaghlaigh ag teastáil

Leanaí atá ag dul faoi oideachas speisialta nó atá i gcúram faoisimh

Má tá do leanbh ag freastal ar scoil riachtanas speisialta nó i gcúram faoisimh, cuirfidh dochtúir sláinte poiblí glao ort má bhíonn cás nó ráig de COVID-19 ann. Inseoidh sé nó sí duit céard is gá duit féin agus do do leanbh a dhéanamh.

Athbhreithniú deireanach ar an leathanach: 18 Aibreán 2023