Beart breise is ea tástálacha antaigine le tú féin agus daoine eile a chosaint ar COVID-19 (coróinvíreas).
Tú féin a dhéanfaidh na tástálacha. Úsáidfidh tú maipín le sampla a ghlacadh ó do shrón. Murab ionann agus tástáil PCR le haghaidh COVID-19, ní gá an sampla tástála a chur chuig saotharlann. Gheobhaidh tú an toradh i gceann 15 nóiméad de ghnáth.
Cineálacha tástála antaigine
Ná húsáid ach tástáil antaigine a bhfuil comhartha CE ar a pacáistiú a bhfuil uimhir 4 dhigit mar chuid de.
Comhartha caighdeán cáilíochta atá sa chomhartha CE le haghaidh táirgí a dhíoltar ar an margadh Eorpach. Is éard is ciall leis an gcomhartha ná go bhfuil an táirge i gcomhréir le caighdeáin agus feidhmíocht sábháilteachta na hEorpa.
An chaoi le tástáil antaigine a dhéanamh
Lean na treoracha a ghabhann leis an tástáil. D'fhéadfadh sé nach mbeadh na treoracha céanna i gceist le tástáil amháin agus tástáil eile.
Treoir ghinearálta maidir le tástáil antaigine a dhéanamh
- Déan do lámha a ní nó a dhíghalrú.
- Cuir na rudaí go léir atá sa phacáiste tástála amach ar dhromchla glan.
- Oscail an feadán agus cuir sa choinneálaí é. Cuirtear leacht i gcuid de na feadáin roimh ré ach i gcásanna eile b'fhéidir go mbeadh ort fial leachta a chur isteach san fheadán.
- Déan do shrón a shéideadh.
- Oscail cumhdach an mhaipín – ná leag méar ach ar hanla an mhaipín; ná leag méar ar an bpillín bog ag an mbarr.
- Cuir an maipín isteach i do pholl sróine clé go dtí go mbraithfidh tú bac, idir 2cm agus 4cm de ghnáth.
- Cas an maipín timpeall 5 huaire istigh sa pholl sróine.
- Úsáid an maipín céanna leis an bpróiseas a dhéanamh arís sa pholl sróine deas.
- Cuir an maipín isteach san fheadán go dtí go mbeidh an pillín bog faoin leacht.
- Corraigh an maipín timpeall go ceann thart ar 1 nóiméad lena chinntiú go mbeidh an deis ag an leacht an sampla atá ar an maipín a ionsú.
- Brúigh barr an fheadáin le dhá mhéar lena dhúnadh agus tarraing an maipín amach tríd an oscailt go deas réidh.
- Cuir ceann de na caipíní beaga plaisteacha ar bharr an fheadáin.
- Cuir 4 bhraon den leacht isteach san fheiste thástála.
- Fan an tréimhse ama atá molta sna treoracha – 15 nóiméad de ghnáth.
- Beidh an toradh le feiceáil ar an bhfeiste tástála.
- Nuair a bheidh tú críochnaithe leis an tástáil antaigine, cuir i mála plaisteach í agus cuir an mála plaisteach i do bhosca bruscair.
I gcás leanaí atá:
- faoi bhun 4 bliana d'aois, níor chóir tástálacha antaigine a dhéanamh orthu
- idir 4 bliana agus 12 bhliain d'aois, ba chóir dóibhsean tástálacha antaigine a dhéanamh agus cabhair acu ó thuismitheoir nó caomhnóir
- idir 13 agus 16 bliana d'aois, ba chóir do thuismitheoir nó caomhnóir súil a choinneáil orthusan agus tástálacha antaigine ar siúl acu
Tuilleadh eolais maidir leis an gcaoi le tástáil antaigine a dhéanamh le do leanbh
Torthaí tástála antaigine
Is ann do 3 chineál toraidh ar thástáil antaigine:
- deimhneach (braitheadh é)
- diúltach (níor braitheadh é)
- neamhbhailí
Toradh tástála le haghaidh COVID-19
An fhadhb le tástálacha antaigine
Bíonn tástáil antaigine níos gasta ná tástáil PCR ach gan a bheith chomh hiontaofa céanna. I gcásanna áirithe, d'fhéadfadh sé nach mbraithfeadh an tástáil antaigine an víreas.